Tiziri-w

. Tejarraḥ tasa-w tezza

tettwet teqqed tesnahtit

ulac aṭṭan ur ttenḥuza

yettas-ed di m-kul tallit

Yargel webrid i ttawiɣ

ṭṭamaεeɣ sendeɣ s-amenni

s imeṭṭi suɣeɣ ttεenniɣ

tebbeḍ teɣri-w s-igenni

.Ṛuḥeɣ wwḍeɣ armi d tafukt

Niɣ-as acḥal ttumarteɣ

tuzl-ed! Mi yidwala tagut

tɣummit aken ur tẓarreɣ

Ṛuḥeɣ ad ẓreɣ aggur

ur tufiɣ, ur ẓriɣ anda yerra ?

tedduɣ yekkat-iyi wugur

wwiɣ abrid s tmara

. Rziɣ ar lmektub a teẓreɣ

yugi yezzi-yid s waεrur

yennuɣ-iyi-d ur uḥtameɣ

yena-yid : « fukken lahdur

Yalwa d amek  id as-yura

wa d tawaɣit, wa di lfaṛḥ ittεummu

qbel ddunit akken tella

ur ttcekti, ur yittlummu »

. Kreɣ nudeɣ ɣaf akud

Ufiɣ-t yaɣṣeb tikli

yenna-yid : « ma tesεiḍ afud

bedd di tizi akin wali

 Nekk ur ttṛǧuɣ yiwen

s zik-iw ulac win aṛǧiɣ

d akussar neɣ d asawen

nekk-i nni warǧin aεyiɣ »

.Ɣaf  yiri n lebḥaṛ qqimeɣ

ruɣ imeṭṭi di tsusmi

ṭṭlam yebda ad iselleɣ

tafukt tṛuḥ teǧǧ-ayi

Refdeɣ allen-iw s igenni

ttmuquleɣ cbaḥa n yetran

tluεa-yid tziri tenna-yi :

« barka-k imeṭṭawen d laḥzan »

. Yewweḍ-ed lefjer tlul-ed tṣebḥit

tḍall-ed tafat fell-i

walleɣ teǧǧuǧeg ddunit

lfaṛḥ yarz-ad ɣuri

Mgal-iw mi ttid zemḍeɣ

ukiɣ s wul-iw yelli

s idisan-is kra zedweɣ

ass-a! Ur  s-ttεemmideɣ attaɣli

.Ssel iwsefru s taɣect n MESSAOUDENE  Fahim, dag-i.

*Asefru « Tiziri-w »  yura-t MESƐUDEN  Fahim, yecna-t Aḥsen Bunser n tarbaɛt n YUFITREN.

(Le Texte Tiziri-w écrit par MESSAOUDENE  Fahim et Chanter par Ahcène .B, du Groupe YUFITREN).